вторник, 22 августа 2017 г.

Серпасъяс сиӧмаӧсь "Айму вӧсна ыджыд тышлы"

МИТЮШЕВ П.М.  "22 лӧддза- номъя 1941 во"

ЕРМОЛИН Р. Н. "Ода - кора 1945 во"

ЕРМОЛИН Р. Н. "Казьтылöм"


СЕМЯЧКОВ П.И. "Лыжно - оленный батальон"


ЕРМОЛИН Р. Н.   " 22 лӧддза - номъя 1941 во"


СЕМЯЧКОВ П.И. "Тыш помасис"


ИГНАТОВ В.Г. "Подвиг В.П. Кисляковлöн"


ИГНАТОВ В.Г. "Позиция вылö"


Николай Васильевич Оплеснин - Айму вӧсна Ыджыд тыш вылӧ ветлысь

 Николай Оплеснин чужис Вӧлӧгда губерня Усть-Сысольск уездса Давйын (ӧні — Коми Республикаса Сыктывдін район Выльгорт сикт Дав грезд) 1914 вося ӧшым тӧлысь 12-ӧд лунӧ. Сыктывкарын Республиканскӧй (ӧні Орджоникидзе) улича вывса керкаын колис сылӧн челядь дырйиыс. Зонка быдмис батьтӧгыс, коді усис Медводдза мирӧвӧй тыш кадӧ. Ичӧт дырсянь Николай киськасис ваӧн, радейтiс спортӧ. Ветлӧдліс нималана коми серпасалысь Валентин Поляковлӧн живопись серти урокъяс вылӧ, та вӧсна кужис бура серпасасьны. Николай Оплеснинлӧн воча вокыс Сергей Михайлович Кочев казьтылӧ: «Коля был для меня примером во всем: занимался лыжным и велосипедным спортом, плаванием, легкой атлетикой. А самое главное – он был справедливым и честным. В его доме меня всегда принимали с радостью, его мама и отчим были хлебосольными и гостеприимными хозяевами. Как и все дети, мы шалили, играли в прятки и догонялки. Он верховодил во всех забавах. У нас даже был свой акробатический номер: мы забирались на плечи друг другу, образуя пирамиду, и старались простоять в таком положении как можно дольше».Школаын на велӧдчигӧн Николай Оплеснин котыртіс вит морта команда да мӧдӧдчис Сыктывкарсянь Кардорӧ сюрс километра кузьта лызь походӧ. 1934 воын сійӧ «вит» вылӧ помаліс Сыктывкарса строительнӧй техникум. Уджаліс инженер-строительӧн Сыктывкарса проект дасьтан котырын. Сылӧн проектъяс серти Сыктывкарын кыпӧдӧма парашутӧн чеччалан вышка да некымын олан керка. Армиаӧ Николай Оплеснин мӧдӧдчис 1936 воын. 1936—1938 воясӧ сійӧ служитіс Москваын НКВД дивизиаын: красноармееч, ичӧт комсостав дасьтан полкӧвӧй школаса курсант, пулемёт юкӧдса командир, взводса командир. 1938 восянь — Уджалысь да Кресьтянаяслӧн Гӧрд Армиаын (РККА-ын). Помаліс шӧр командиръяслысь регыдъя курсъяс. Эз ӧтчыдысь восьлав Гӧрд изъэрді парадъяс дырйи. Бӧрыннас висьтавліс, мый аддзыліс Сталинӧс, Молотовӧс, Берияӧс, Чкаловӧс. 1939—1940 воясӧ Н.В. Оплеснин — 111-ӧд стрелкӧвӧй дивизиаын пулемёт взводса командир. 1937 воын пуксьӧдісны сылысь ыджыд батьсӧ — Выльгорт вичкоса староста Ефим Петрович Кочевӧс, коді муніс вичко тупкӧмлы паныд. Во мысти сійӧс лыйлісны. Сэк жӧ лыйлісны Николай дядьсӧ (мамлӧн ичӧт чойыслӧн верӧсыс). Нывбабасӧ пуксьӧдісны 8 во кежлӧ, и сійӧ кулі лагерын. Кор Николай Оплеснин воліс гортас шойччыны, сылы вӧзйисны кольччыны уджавны НКВД-лӧн Сыктывкарса юкӧнӧ, но эз лок. Сёрӧнджык Надежда Николаевна гӧтырыслы шуӧма, мый «оз кӧсйы служитны налы, коді виялӧ мыжтӧм йӧзӧс». Айму вӧсна Ыджыд тыш пансигӧн Николай вӧлі Вӧлӧгдаса военнӧй лагерын. Приказ воӧм бӧрын лӧддза-номъя тӧлысьӧ мӧдӧдчӧ Рытыв-Войвыв фронтӧ, кольӧ том гӧтырсӧ да арӧса Инна нывсӧ. Айму вӧсна Ыджыд тыш кадӧ тышкасис Рытыв-Войвыв (Остров да Псков каръяс улын), Ленинград (Луга кар улын) да Волхов фронтъясын. Вӧлі стрелкӧвӧй полкса штабын разведкаса опицерӧн, 52-ӧд торъя армиалӧн 111-ӧд стрелкӧвӧй дивизиа штабысь оперативнӧй отделса начальниклы отсасьысьӧн, младшӧй лентенантӧн. 1941 вося кӧч тӧлысьӧ 111-ӧд дивизиа веськаліс кытшӧ. Медым сэтысь петны, колӧ вӧлі немечкӧд тышкасьӧмӧн воӧдчыны Волхов юӧ да вуджны сійӧс. Враглӧн ён би улын Оплеснин куимысь вуджавліс Волхов ю 1941 вося кӧч тӧлысьӧ (20, 25 да 29-ӧд лунъясӧ) Вылькар обласьтысь Поддор районса Ямно сикт весьтын да лӧсьӧдіс йитӧд Гӧрд Армиалӧн медшӧр вынъяскӧд. Сылӧн ӧтсӧгӧн дивизияыс петіс враглӧн кытшысь, вуджис Волхов ю да ӧтувтчис армиалӧн войскаяскӧд. Тайӧ подвигсьыс 1941 вося ӧшым тӧлысь 27-ӧд лунӧ Н. Оплеснинлы сетӧма Сӧветскӧй Союзса Геройлысь почёт ним. Оплеснин лои Волхов фронтын ССССР-са медводдза Геройӧн. Ленин орден да «Зарни Кодзув» медаль (511 №) босьтӧм бӧрын 1942 вося урасьӧм тӧлысьӧ сійӧ воліс Сыктывкарӧ, аддзысьліс семьяыскӧд, ёртъясыскӧд да бӧр мӧдӧдчис фронтӧ. Усис тыш дырйи 1942 вося рака тӧлысь 19-ӧд лунӧ Новгород обласьтса Чудово карсянь неылын, кор вӧлі дасьтӧны боевӧй операциа, медым жугӧдны Ленинград гӧгӧрысь блокада. Сэки Оплеснин вӧлі колльӧдӧ дивизиа штабса начальникӧс передӧвӧйын. Найӧ веськалісны артиллериа би улӧ да кулісны. Найӧс гуалісны Чудово кар гӧгӧрса вӧръясын. Айму вӧсна Ыджыд тыш бӧрын Оплеснинӧс гуалісны Чудово карса Шӧр паркын, 1960 воын кыпӧдісны геройлы паметник. 1985 воын сылысь гусӧ вуджӧдісны усьӧм воинъяслы Мемориалӧ, мый кыпӧдісны тайӧ жӧ карас.

Наградаяс:
Сӧветскӧй Союзса Герой почёт ним (1942.12.27)
Ленин орден (1942.12.27)
«Зарни Кодзув» медаль (511 №) (1942.12.27)

Н.В. Оплеснинлысь нимсӧ сетӧма Чудово, Сыктывкар, Уква да Сосногорск каръясын уличаяслы.
Герой ним новлӧ Выльгортса шӧр школа.
Н.В. Оплеснинлы паметник сувтӧдӧма Сыктывкарын сы местаын, кӧні коркӧ сулаліс кисьтӧм керка, кӧні овліс тыш вылӧ мунтӧдз Герой.
1965 вося ода-кора тӧлысь 9-ӧд лунӧ Укваын Оплеснин улича 14-ӧд №-а керкаын вӧлі ӧшӧдӧма еджыд мраморысь Н.В. Оплеснин чужӧма барельеф.
Сосногорскын Н. Оплеснин улича 14-ӧд №-а керкаын сувтӧдӧма геройлы казьтылана пӧв.
«Комиавиатранс» компаниа сетіс Н.В. Оплеснинлысь ним L-410 самолётлы.

Содтӧд юӧр позьӧ аддзыны:
Молодежная редакция профобразования сайтын Н.В. Оплеснин йылысь
Коми АССР в годы Великой Отечественной войны. 1941—1945.
Александров А.Н. Во имя жизни. — Сыктывкар, 1966.
Республика Коми. Энциклопедия: в 3-х т. — Сыктывкар, 1999. — Т. 2.

Материалыс Коми википедияысь: https://kv.wikipedia.org/wiki/Оплеснин_Николай_Василь..


 

четверг, 22 июня 2017 г.

76 во сайын пансис вир кисьтана тыш

Сизимдас квайт во сайын, 1941 вося лöддза - номъя 22 лунö водз асылö пансис ыджыд тыш. Германия виччысьтöг уськöдчис Сöветскöй Союз вылö.  Нёль во мунiс ыджыд шог, дой, синва. Быд лун, быд керкаын, котырын виччысисны фронт вывсянь юöр. 1418 лун да вой ковмис матыстны Вермöм лун. Кытысь сöмын босьтчылiс йöзлöн выныс  став шогсö венны? Айму дорö муслуныс отсалiс миян йöзлы дорны Вермöм лун. И öнöдз на олöны геройясыс миянкöд. Ыджыд аттьö югыд тулысысь! Тулыс - тайö кад, кор ставыс ловзьö, быдмö, вежöдö, воссьö, югдö. И миян челядьлы, быдмысь войтырлы колö гöгöрвоöдны, кутшöм ыджыд донöн шедiс талунъя олöмыс. Куслытöм би дорын казьтылам югыд паметьсö усьöм геройяслысь Айму вöсна Ыджыд тышын.



воскресенье, 28 мая 2017 г.

Ыбса интернат

1942 воын Ыб сиктын вöлi восьтöма интернат инвалидъяслы, кодъяс тышкасьöмаöсь Айму вöсна. Интернатыс вöлi кык судтаа. Медводдза судтаас  служебнöй помещениеяс, а мöдас  олiсны инвалидъяс. Торъя керкаясын вöлiны сёян – юан, киноклуб, узьланiн. Сiдз жö вöлiны пывсян, прачечнöй, юкмöс. Медводдза интернат веськöдлысь - Костарев Егор Александрович, фронтовик. Сэсся Потапов, Микушев, Елькин М.С. Интернатас олiсны да уджалiсны, кыдз локтысь инвалидъяс, сiдз и ыбсаяс. Танi велöдiсны вурсьыны, чинтавны кöмкот, ворсны гудöк вылын, фотографируйтны.

Ыбса велöдысьяс тыш кадö.

Ыбса велöдчанiн (Сыктывдiн район) 1942 воын лоö шöр велöдчанiнöн. Медводз восьтöмась 8 класс, сэсся – 9, медводдза выпускыс 9 класса велöдчысьяслöн ода – кора тöлысь 1944 воö. Велöдчöмыс ыджыд классъясын вöлi дон босьтöмöн. Айму вöсна тыш вылын кувсисны 15 велöдысь: Бобков С.П., Галанин П.А., Ильчуков М.И., Лапшин И.Д., Максимов А.Я., Муравьёв Н.Н., Осипов М.Я., Петрунёв И.П., Попов А.А., Попов Г.И., Семягин Н.Т., Сивков Г.А., Сухачёв С.Я., Томов В.М., Худоев С.А, а сiдз жö КГПИса студент Муравьёв А.И., Сыктывкарса педучилищеысь студент Колегов А.Н, кыкнаныс Ыб сиктысь. Локтiсны тыш вылысь да кутiсны велöдны ыбса велöдчанiнын С.С.Аввакумов, А.Г.Захаров, В.Г.Кузиванов, В.М.Муравьёв, С.Н.Муравьёв, Д.Я.Попов, М.И.Симаков, Н.Л.Стародубцев, И.Е.Томов, И.Я.Томов.